Рускиот претседател Владимир Путин му се извини на претседателот на соседен Азербејџан за соборувањето на комерцијалниот патнички авион во рускиот воздушен простор, во кој загинаа 38 лица – но не кажа дека Русија е одговорна. Во своите први коментари за падот на 25 декември, Путин рече дека „трагичниот инцидент“ се случил кога руските системи за противвоздушна одбрана активно одбивале украински беспилотни летала. Украинскиот претседател Володимир Зеленски рече дека Русија мора „да престане да шири дезинформации“ за нападот.
Авионот на „Азербејџан ерлајнс“ наводно бил под оган од руските системи за противвоздушна одбрана додека се обидувал да слета во Чеченија – принудувајќи го да се пренасочи преку Каспиското Море. Несреќно слета во Казахстан, при што загинаа 38 од 67 патници и ќленови на екипажот.
Кремљ денеска објави соопштение во кое истакна дека Путин телефонски разговарал со претседателот на Азербејџан Илхам Алиев.
„Претседателот Владимир Путин се извини за трагичниот инцидент што се случи во рускиот воздушен простор и уште еднаш изрази длабоко и искрено сочувство до семејствата на жртвите и им посака брзо закрепнување на повредените“, се вели во соопштението.
Во соопштението на Кремљ не е директно признаено дека авионот бил погоден од руски проектил. Претходно, Кремљ одби да каже дали е вмешан во несреќата. Но, руските воздухопловни власти рекоа дека ситуацијата во регионот е „многу комплицирана“ поради нападите со украински беспилотни летала врз Чеченија.
Воздухопловни експерти и други во Азербејџан веруваат дека ГПС-системите на авионот биле погодени од електронско блокирање и потоа бил оштетен од шрапнели од експлозии на руски ракети за воздушна одбрана. Преживеаните претходно пријавиле дека слушнале силни удари пред да се урне авионот, што сугерира дека бил цел на напад.
Азербејџан официјално не ја обвини Русија оваа недела, но министерот за транспорт на земјата рече дека авионот бил предмет на „надворешно мешање“ и оштетен внатре и надвор додека се обидувал да слета. Американските одбранбени претставници вчера, исто така, рекоа дека веруваа оти Русија е одговорна за падот на авионот.
