Романскиот министер за одбрана Јонуц Моштеану денеска си поднесе оставка по избивањето на скандал поврзан со несовпаѓања во неговата биографија, кои беа откриени преку новинарско истражување.

Контроверзиите започнаа откако медиумот „Либертатеа“ објави дека Моштеану во својата прва официјална биографија (ЦВ) лажно навел оти дипломирал на Универзитетот „Атенеум“ – институција која негираше дека тој некогаш бил нејзин студент. Соочен со обвинувањата, тој призна дека станува збор за „грешка“ и презентираше друга диплома стекната во 2015 година.

Премиерот Илие Болојан потврди дека ја прифатил оставката на Моштеану и најави дека ќе му предложи на претседателот испразнетото место привремено да го пополни министерот за економија, Раду Мируца.

Во официјалното соопштение, Моштеану кажа дека не сака дискусиите за неговото образование да бидат дефокус во време на безбедносни предизвици.

„Романија и Европа се под напад од Русија. Нашата национална безбедност мора да се брани по секоја цена. Не сакам дискусиите за моето образование и грешките што ги направив пред многу години да го одвлечат вниманието на оние што ја водат земјата од нивната тешка мисија“, изјави Моштеану.

Скандалот ескалираше неделава кога Моштеану, како одговор на нападите од опозициската партија АУР и коалицискиот партнер ПСД, на Фејсбук ја објави својата диплома. Тој објасни дека има диплома по менаџмент од Универзитетот „Биотера“ од 2015 година, а студирањето на престижниот факултет за компјутерски инженеринг го прекинал за да работи.