Русија го изведе еден од најголемите напади врз Киев досега, предизвикувајќи штети во седум од десетте градски окрузи. Властите кажаа дека едно лице загина. 

Претседателот Володимир Зеленски изјави дека Русија лансирала 315 дронови кон Украина ноќеска, при што има двајца загинати во Одеса, каде што биле погодени станбени и болнички објекти, вклучувајќи породилиште.

„Ноќешниот напад врз Киев беше еден од најголемите од почетокот на војната“, рече Зеленски.

Експлозии се слушаа низ целиот град, а ноќното небо беше осветлено во портокалово.

Русија ги засили воздушните удари врз украинските градови во изминатите денови, за кои кажа дека се одговор на големиот украински напад врз руските воздушни бази, во кој беа уништени и стратешки бомбардери.

„Нашата противвоздушна одбрана собори 277 дронови и сите седум руски проектили. Тревогата за воздушна опасност беше во сила цели пет часа“, објавија украинските воздушни сили.

Според нивни податоци, Русија лансирала 1.451 дрон и 78 проектили во изминатата недела.