Десетици луѓе се повредени во рускиот воздушен напад на Киев ноќеска, што се совпадна со заминувањето на Володимир Зеленски од САД. Градоначалникот на Киев, Витали Кличко, изјави дека се ранети 53 цивили, од кои шест деца.

Властите кажаа дека противвоздушната одбрана соборила десет руски балистички проектили, чии остатоци паднале и на градинка и болница.

Зеленски беше во втората посета на Белата куќа од почетокот на руската инвазија во обид да го наговори Конгресот да одобри нова воена помош за Украина, но не постигна значаен напредок во премислувањето на републиканските законодавци. И лидерите на Европската Унија утре ќе расправаат за дополнителна помош за Украина.

Џо Бајден ги предупреди Републиканците дека ќе му дадат божиќен подарок на Путин ако не ја одблокираат новата воена помош за Украина, која изнесува 61 милијарда долари.

Ноќешниот ракетен напад на Киев беше втор за една недела. Иако градот беше напаѓан со дронови во изминатите недели, тој беше поштеден од ракетни удари 79 дена до последниот петок. Украинската војска кажа дека ги соборила сите десет проектили насочени кон Киев, вклучувајќи „искандер-М“ и „С-400“.