Русија првпат почна да ги користи севернокорејските трупи во значителни бројки за да спроведе напади на украинските сили кои се борат да го задржат освоеното во рускиот регион Курск, вели украинскиот претседател Володимир Зеленски.

Украинскиот лидер рече дека поактивната употреба на војниците од Северна Кореја е нова ескалација на војната и повика на глобален одговор.

„Веќе имаме прелиминарни податоци дека Русите почнаа да ги користат севернокорејските војници во нивните напади. Значителен број од нив“, кажа Зеленски во неговото дневно обраќање во саботата.

Засега, севернокорејските војници учествуваат во битките само во регионот Курск.

Киев првпат кажа дека војници од Северна Кореја се појавиле на фронтот во Курск во октомври. Проценките се дека вкупно има 11.000 војници од Северна Кореја.

Русија ниту го потврдува, ниту го негира присуството на севернокорејските војници.

Украина изврши инвазија на рускиот регион Курск во август и сè уште контролира парче руска територија, нешто што би можела да го искористи при евентуални преговори за крај на војната.