Руски воен авион се урна на окупираниот украински полуостров Крим, при што загинаа 30 луѓе, објави руското министерство за одбрана. Остатоците од транспортниот авион „Ан-26“ биле пронајдени откако го изгубил контактот со властите за време на рутински лет.

Од министерството кажаа дека причината за падот е техничка грешка и дека не било пукано кон авионот. Рускиот Истражен комитет ја потврди несреќата и соопшти дека отворил истрага за прекршување на безбедноста на летањето.

Во авионот имало 23 патници и седум члена на екипажот. Неименуван извор изјави за агенцијата „ТАСС“ дека авионот удрил во карпа 25 километри источно од градот Севастопол.

„Ан-26“ е двомоторен авион што се произведуваше во Советскиот Сојуз од 1969 до 1985 година.