Александар Пичушкин, руски сериски убиец осуден на доживотен затвор во 2007 за убиство на 48 луѓе, изјави дека е подготвен да признае уште 11 убиства, соопшти денеска руската казнена служба. Жртви на Пичушкин, кој сега има 50 години, беа често бездомници, алкохоличари и постари лица околу паркот Бицевски, големо зелено пространство во јужниот дел на Москва. Неговите убиства траеја од 1992 до 2006.

Руските медиуми му дадоа прекар „убиецот со шаховска табла“ затоа што признаваји ги убиствата им кажал на детективите дека се надевал оти ќе стави паричка на секој квадрат од шаховска табла од 64 квадрати за секоја своја жртва. Откако беше осуден, Пичушкин е затворен во затворот „Поларен був“, на далечниот северен Арктик на Русија.

Во соопштението објавено на апликацијата за Телеграм, руската казнена служба денеска соопшти дека Пичушкин им кажал на истражителите оти е подготвен да признае уште 11 убиства на мажи и жени. Пичушкин долго време беше осомничен за дополнителни убиства покрај оние за кои беше осуден.

Тој за време на неговото судење тврдеше дека убил 63 луѓе, но обвинителите го обвинија само за 48 убиства и три обиди за убиства.
Ако биде осуден за дополнителните убиства, Пичушкин ќе стане втор најголем сериски убиец во Русија досега, зад Михаил Попков, поранешен полицаец осуден за 78 убиства.