САД не сакаат да поддржат нова нацрт-резолуција на Обединетите нации која го поддржува територијалниот интегритет на Украина и ја осудува руската агресија, кажаа три дипломатски извори за „Ројтерс“. Со оваа резолуција треба да се одбележат три години од почетокот на руската инвазија врз Украина.

Вашингтон значително го промени односот кон Украина по враќањето на Доналд Трамп во Белата куќа, а двајцата претседатели разменија остри зборови вчера, при што Трамп го нарече Володимир Зеленски диктатор кој не сака да распише избори.

Новата нацрт-резолуција на Генералното собрание на ОН ја осудува руската агресија и ја нагласува посветеноста кон суверенитетот, независноста и територијалниот интегритет на Украина во нејзините меѓународно признати граници.

„Во изминатите години САД постојано коспонзорираа вакви резолуции за поддршка на мирот во Украина“, изјави еден извор.

Друг извор кажа дека резолуцијата е поддржана од повеќе од 50 земји, без да каже кои.

„Како што сега стојат работите, САД нема да ја потпишат“, кажа изворот.

Русија досега зазеде околу 20% од Украина и постепено напредува на истокот на земјата, додека истовремено дава сигнали дека сака да почне мировни разговори.