Шпанската полиција уапси пет лица кои се обвинети дека измамиле две жени за 325 илјади долари, откако онлајн објавиле слики претставувајќи се како холивудската ѕвезда Бред Пит. Осомничените се запознале со жените на интернет страница за обожаватели на оскаровецот и ги навеле да веруваат дека „имаат емотивна врска со него“, стои во соопштението на шпанската полиција.

Претставувајќи се како Пит, членовите на групата потоа наводно ги охрабрувале жените да инвестираат во различни проекти кои не постоеле.

Една од жртвите, од јужниот регион Андалузија, била измамена за 175 илјади евра, додека другата, од северниот дел на Баскија, изгубила 150 илјади евра.

„Сајбер-криминалците, за да ги фатат жртвите, ги проучувале нивните социјални мрежи и направиле психолошки профил на нив, со што откриле дека двете жени се две ранливи лица, на кои им недостасува блискост и се во депресија“, соопшти полицијата.

Тие, исто така, користеле платформи за инстант пораки за размена на пораки и е-пошта со двете жени, додека не стигнале до степен каде што верувале дека разговараат преку Вотсап со самиот Бред Пит, кој им ветувал љубовна врска и заедничка иднина.

Полицијата уапси пет лица во јужниот регион на Андалузија, вклучувајќи ги и осомничените водачи на групата. Тие упаднаа во пет домови како дел од нивните акции, одземајќи неколку мобилни телефони, банкарски картички, два компјутера и дневник „во кој се запишани фразите што измамниците ги користеле за да ги измамат своите жртви“.

Полицајците  успеале да повратат 85 илјади евра кои биле измамени од двете жени.