Спасувачите се борат со силен дожд, снег и ниски температури додека се тркаат со времето да пронајдат преживеани по вчерашниот катастрофален земјотрес во југоисточна Турција и Сирија, кој според последните официјални информации, однесол повеќе од 4.800 животи, а 15.000 се повредени од двете страни на границата. Светската здравствена организација предупреди дека бројот на жртвите би можел да биде и осумкратно поголем.

Турската агенција за итни случаи кажа дека во погодените подрачја се испратени повеќе од 2.600 спасувачи од 65 држави, а испорачани се и 300.000 ќебиња и 41.000 семејни шатори.

Од урнатините се извлечени повеќе од 8.000 преживеани. (Фото: Гети)

Илјадници згради се урнаа во Турција и Сирија во земјотресот со јачина од 7,8 степени според Рихтеровата скала, а неполни 12 часа подоцна уследи уште еден од 7,5 степени. Ноќеска бил регистриран уште еден посилен земјотрес од 5,5 степени, како и многубројни афтершокови.

Голем број држави објавија дека ќе испратат помош во Турција и Сирија, вклучувајќи специјалистички тимови и кучиња трагачи, а во меѓувреме, од урнатините се извлечени повеќе од 8.000 преживеани. Земјотресот предизвика сериозни оштетувања на три аеродроми во Турција, што дополнително ги отежнува спасувачките напори.

Земјотресот погоди десет провинции во Турција и донесе уште мизерија во областите во Сирија кои доживеаја огромни страдања во изминатите десет години.