Српските студенти кои велат дека се борат за правда и владеење на правото тргна со велосипеди на 1.300 километри долг пат до Стразбур за да побараат поддршка од Европската Унија. Во конвојот што тргна од Нови Сад се околу 80 студенти и се очекува нивното патување да трае неколку дена.

Тие сакаат да го свртат вниманието на ЕУ кон повеќемесечните протести против корупција во Србија, иницирани од трагедијата на железничката станица во Нови Сад на 1 ноември, кога во уривањето на настрешницата загинаа 16 луѓе.

Студентите се клучна сила зад блокадите и речиси секојдневните протести и маршеви во Србија, кои ја разнишаа цврстата власт на Александар Вучиќ. Иако имаат голема поддршка дома, тие се жалат дека досега немаат добиено доволно поддршка од ЕУ.

„Знам дека ќе биде тешко, но мислам дека ќе вреди. Очекуваме некој конечно да реагира на ситуацијата во Србија“, изјави Иван Потурица, студент од Нови Сад.

Студентите планираат да возат 100-150 километри на ден, при што ќе поминат низ Унгарија, Словачка, Австрија и Германија пред да стигнат во Франција.