Новиот германски канцелар Фридрих Мерц апелираше до нацијата да се обедини за државата да тргне напред, на своето прво обраќање во Парламентот, една недела по преземањето на функцијата.

„Државата сме сите ние. Можеме да ги надминеме сите предизвици, без разлика колку се големи, со наши лични напори“, рече тој во Бундестагот.

Како што се очекуваше, Мерц, кој е конзервативец, се осврна на широк спектар предизвици што се очекува да ја окупираат неговата Влада во следните четири години, од економијата на земјата што се бори со тешкотии до војната во Украина и миграцијата.

Во говорот тој вети дека ќе донесе „просперитет за сите“ и кажа оти е уверен дека земјата може да се претвори во „локомотива за раст“ што ќе се восхитува низ целиот свет. Мерц ​​вети даночни олеснувања, инвестиции во инфраструктурата и намалување на бирократијата.

Германската економија претрпе две последователни години рецесија, бидејќи инфлацијата, високите цени на енергијата и падот на извозот ги оптоваруваат бизнисите. Несогласувањето околу тоа како повторно да се активира економскиот мотор на крајот доведе до распад на претходната централно-левичарска коалиција во ноември, предизвикувајќи предвремени избори на кои на крајот победија конзервативците на Мерц.