Советниците на Доналд Трамп јавно и приватно откриваат предлози за крај на војната во Украина, што предвидува и отстапување на големи делови од Украина на Русија, според анализата што ја направи „Ројтерс“. Предлозите на тројцата клучни советници, вклучувајќи го и новиот застапник за Русија и Украина Кит Келог, делат исти елементи, меѓу кои не е членството на Украина во НАТО.

„Ројтерс“ вели дека тие ќе се обидат да ги натераат Киев и Москва на преговори, што вклучува запирање воена помош за Украина ако таа не сака да разговара, односно зголемување на поддршката ако Путин одбие.

За време на кампањата, Трамп постојано истакнуваше дека може да ја заврши војната за еден ден, но досега не открил како планира да го направи тоа. Аналитичари и поранешни функционери се сомневаат дека Трамп може да го оствари тоа поради сложеноста на конфликтот.

Украинскиот претседател Володимир Зеленски, чија војска се соочува со недостиг на луѓе, навести дека би бил отворен за преговори и иако не се откажува од членството во НАТО, смета дека некои окупирани територии можат да се повратат по дипломатски пат.

Некои сметаат дека Трамп нема да успее да го наговори Путин да попушти, особено сега, кога Русите се во налет. Путин исто така не покажа подготвеност да се откаже од своите услови за примирје и разговори. Русија веќе го контролира целиот Крим, како и 80% од Донбас и 70% од Запорожје и Херсон, но и мали делови од регионите Миколаив и Харкив.

До минатата недела, Трамп сѐ уште немал составено централна работна група која треба да подготви мировен план, според четворица негови советници. Место тоа, неколкумина советници изложуваа свои идеи на јавни форуми или на самиот Трамп.

„На крајот, мировниот договор најверојатно ќе зависи од директниот личен ангажман помеѓу Трамп, Путин и Зеленски“, рекоа советниците.