Украинскиот претседател Володимир Зеленски уште еднаш побара од западните нации да испратат само мал дел од нивните залихи оружје и ги запраша дали се плашат од Москва. Неколку земји ветија дека ќе испратат противтенковски и противвоздушни проектили, но Зеленски вели дека на Украина ѝ требаат тенкови, авиони и противбродски системи.

„Тоа е она што го имаат нашите партнери и само собира прашина кај нив. Ние се бориме не само за слободата на Украина, туку и за слободата на Европа. На Украина ѝ треба само 1% од вашите тенкови и авиони, не бараме повеќе“, изјави Зеленски.

Тој ја обвини Москва дека сее длабока омраза кон Русија меѓу Украинците со тоа што константно ги гранатира и ракетира градовите и убива цивили. Вадим Денисенко, советникот на министерот за внатрешни работи, кажа дека Русија почнала да ги напаѓа и украинските складишта на гориво и храна.

„Чекаме веќе 31 ден. Кој е главен во евроатлантската заедница? Да не е Русија? Дали толку ѝ се плашите на Москва?“, кажа Зеленски.

Тој изрази разочарување што руските борбени авиони сè уште не се префрлени од источна Европа во Украина.

„Цената на одолговлекувањето со авионите е илјадници украински животи“.

Британското министерство за одбрана кажа дека руската војска се обидува да ги окружи украинските сили во сепаратистичките источни региони, при што напредува од правецот на Харкив и Мариупол. Москва пред неколку дена кажа дека фокусот на „специјалната воена операција“ ќе се сврти кон целосното ослободување на Донбас.