Доналд Трамп разговараше со Володимир Зеленски за првпат од нивниот жесток судир во Белата куќа на 28 февруари, што уследи само ден по телефонскиот разговор на американскиот претседател со Владимир Путин.

„На добар пат сме. Имав многу добар телефонски разговор со Зеленски, што траеше околу еден час. Голем дел од разговорот се засноваше врз вчерашниот разговор со Путин, со цел Русија и Украина да се усогласат во однос на нивните барања и потреби“, кажа Трамп.

Тој му предложил на Зеленски САД да ја преземат контролата врз украинските електрани заради нивната сигурност.

„Американската сопственост на тие постројки може да биде најдобрата заштита за таа инфраструктура“, рекол Трамп.

Осврнувајќи се на разговорот, Зеленски кажа дека траен мир може да се постигне само под водство на Америка и додаде дека Украина и САД ќе продолжат да одржуваат контакт.

Белата куќа додаде дека САД моментално не размислуваат за договор за минерали, туку повеќе се фокусирани на мировни преговори.

„Вистина е дека Путин вчера предложи САД и Русија да одиграат хокејарски натпревар, но ние повеќе сме заинтересирани за мировен договор“, изјави портпаролката на Белата куќа, Керолајн Ливит.

Путин вчера го одби предлогот за целосно 30-дневно примирје, што претходно беше прифатено од Украина и место тоа, само ѝ нареди на војската да прекине со нападите врз украинскиот енергетски систем на 30 дена. И покрај тоа, Русија и Украина меѓусебно се напаѓаа со дронови изминатата ноќ.

„Русија покажува дека не е спремна за мир. Ако Русите не ги напаѓаат нашите објекти, тогаш и ние дефинитивно нема да ги напаѓаме нивните“, рече Зеленски и предложи САД да надгледуваат каков било прекин на огнот.