Доналд Трамп кажа дека САД наскоро би можеле да постигнат договор со Куба или да преземат друга акција.

„И Куба сака да склучи договор и мислам дека многу скоро или ќе дојдеме до договор или ќе направиме што и да треба. Разговараме со Куба, но прво да завршиме работа со Иран“, кажа Трамп.

Тензиите помеѓу Вашингтон и Хавана остануваат зголемени по долги години санкции, дипломатски несогласувања и спорови околу миграцијата и безбедноста. Кубанскиот претседател Мигел Дијас-Канел во петокот потврди дека започнале разговори со САД, додека островската држава се соочува со една од најтешките економски кризи во последните децении.

„Овие разговори имаат за цел да најдат решенија за билатералните разлики што постојат помеѓу двете нации. Се надевам дека разговорите ќе помогнат да се спречи конфронтација помеѓу двете земји“, рече Дијас-Канел.

Економската криза во земјата е влошена од недостигот на нафта, што ги принуди властите да воведат прекини во снабдувањето со електрична енергија и да ограничат некои јавни услуги. Трамп во последните недели даде серија изјави за Куба, велејќи дека таа е на раб на колапс и дека сака да склучи договор со САД. Тој денеска рече дека Куба може да биде предмет на „пријателско преземање“, а потоа додаде: „Можеби тоа не е пријателско преземање“.