Доналд Трамп потпиша извршна наредба за борба против антисемитизмот и вети дека ќе ги депортира странските студенти и други кои учествувале во пропалестинските демонстрации за време на војната во Газа. Со наредбата се наложува моментална акција против терористички закани, палежи, вандализам и насилство насочени кон американските Евреи и распоредување федерални средства за борба против „експлозија на антисемитизмот на американските кампуси и улици“ од 7 октомври 2023, кога Хамас го нападна Израел.

„До сите странски жители кои се придружија на проџихадистичките протести: ќе ве најдеме и ќе ве депортираме. Исто така, ќе ги укинам студентските визи за сите симпатизери на Хамас во универзитетските кампуси, кои се заразени со радикализам како никогаш досега“, кажа Трамп.

Групи за човекови права и професори по право кажаа дека оваа мерка претставува кршење на уставното право на слобода на говорот и веројатно ќе падне на суд.

„Првиот амандман ги штити сите во САД, па така и странските граѓани кои студираат на американските универзитети. Депортирањето странски граѓани врз основа на нивниот политички говор е неуставно“, изјави Кери Десел од Универзитетот Колумбија.

Упадот на Хамас во Израел и војната во Газа што уследи доведоа до неколкумесечни пропалестински протести на американските универзитети, а групите за човекови права регистрираа пораст на инициденти и напади кои Евреи, муслимани, Арапи и други луѓе од блискоисточно потекло.