Доналд Трамп нареди целосна блокада на сите санкционирани нафтени танкери што влегуваат во Венецуела и излегуваат од неа. Тој кажа дека ја означува владата на Николас Мадуро како странска терористичка организација и ја обвини за кражба на американски имоти, како и за тероризам, криумчарење дрога и трговија со луѓе.

„Затоа денеска наредив тотална и комплетна блокада на сите санкционирани танкери што влегуваат и излегуваат од Венецуела“, кажа Трамп.

Ова следува откако САД минатата недела запленија танкер покрај брегот на Венецуела, чија влада го опиша новиот потег на Трамп како гротескна закана.

„Венецуела е целосно окружена од најголемата армада некогаш собрана во Јужна Америка. Таа ќе станува уште поголема и ќе биде нешто што никогаш не сте го виделе. Така ќе биде додека не ги вратат во САД сите нафтени, копнени и други средства што претходно ни ги украле“, кажа Трамп.

Владата на Трамп постојано ја обвинува владата на Мадуро за шверц на дрога и од септември, американската војска уби повеќе од 90 луѓе во нападите врз бродови што наводно превезуваат дрога. САД исто така распоредија воени бродови и илјадници војници во Карибите.

Венецуела, која е дом на некои од најголемите резерви на нафта во светот, го обвини Вашингтон дека се обидува да ги украде нејзините ресурси. Под водство на Трамп и поранешниот претседател Џо Бајден, САД со години се спротивставуваа на владата на Мадуро и притискаа за негово отстранување со воведување строги санкции. Минатата недела, САД воведоа санкции против нови шест брода кои превезуваат венецуелска нафта.