Четириесет и еден мигрант загинаа во бродолом кај италијанскиот остров Лампедуза, изјавија преживеаните за локалните медиуми. Преживеаните – тројца мажи и една жена – им кажале на спасувачите дека биле на брод со 45 луѓе, меѓу кои и три деца.

Тие кажале дека минатиот четврток тргнале со брод од Сфакс во Тунис, но на пат за Италија, по неколку часа бродот потонал. Ги спасил товарен брод, а потоа биле префрлени на брод на италијанската крајбрежна стража.Четворицата преживеани, по потекло од Брегот на Слоновата Коска и Гвинеја, денеска стигнаа до Лампедуза.

Повеќе од 1.800 луѓе годинава загинаа на преминот од Северна Африка кон Европа.

Италијанската крајбрежна стража во неделата пријавила два бродолома во областа, но не е познато дали овој брод е еден од тие.

Туниските власти велат дека Сфакс, пристанишен град на околу 130 километри од Лампедуза, е популарен за мигрантите кои бараат безбедност и подобар живот во Европа. Последниве денови, италијански патролни чамци и добротворни групи спасија уште 2.000 луѓе кои пристигнаа на Лампедуза.