Три деца на данскиот милијардер Андерс Холх Поулсен се меѓу загинатите во вчерашните бомбашки напади во Шри Ланка, во кои според последните информации има најмалку 290 мртви и над 500 повредени.

Поулсен со сопругата и со четирите деца биле на велигденски одмор во Шри Ланка и Министерството за надворешни работи на Данска претходно потврди дека меѓу загинатите има и тројца дански државјани.

Четириесет и шестгодишниот Поулсен е извршен директор на данската трговска компанија „Бестселер“, која е проценета на 4,5 милијарди фунти и во чија сопственост се неколку брендови. Тој, исто така, е најголемиот акционер во онлајн продавниците „Асос“ и „Заландо“ и поседува повеќе од еден отсто од целото земјиште во Шкотска. На последната листа на милијардери на магазинот „Форбс“ се најде на 252. место.

Освен Данци, потврдено е дека во нападите загинале и државјани на Велика Британија, САД, Холандија, Кина, Турција и Португалија.