Цените на увозните производи во Германија минатиот месец пораснаа за 24,7% во споредба со лани, објави Федералниот завод за статистика. Тоа е најголемиот скок од октомври 1974, кога цените растеа поради нафтеното ембарго поврзано со четвртата Арапско-израелска војна.

Во октомври, цените на германскиот увоз беа повисоки за 21,7%. Аналитичарите очекуваа нов скок во ноември, но предвидуваа дека ќе изнесува 22,3%.

Трендот особено е изразен кај увезената енергија, која била 160% поскапа во споредба со истиот период лани. Природниот гас бил речиси четири пати поскап, додека цените на увезената сурова нафта биле удвоени. Најголем едногодишен раст, од 360%, е забележан кај струјата.

Големите поскапувања се случуваат среде острите тензии во глобалната трговија, што најмногу се должи на пандемијата на коронавирусот.