Турскиот парламент ја одобри апликацијата на Шведска за членство во НАТО по повеќе од четири часа дебата, со што се отстрани голема пречка за проширувањето на западната воена алијанса по 20 месеци одложување. Партијата на претседателот Ердоган, АК, беше меѓу оние кои ја поддржаа апликацијата, додека против беа опозициските националистички, исламистички и левичарски партии.

Се очекува Ердоган да го потпише законот во следните денови, по што Унгарија ќе остане последната членка на НАТО која треба да го ратифицира шведското барање. Унгарскиот премиер Виктор Орбан денеска го покани својот шведски колега Улф Кристерсон да ја посети Будимпешта за да преговараат за условите за прием на Шведска.

Шведска и Финска аплицираа за членство во НАТО во мај 2022, набргу по почетокот на руската инвазија на Украина. Финска стана членка во април 2023, додека Шведска се соочи со низа одложувања, најмногу поради противењето на Турција.