Украина денеска го нападна договорот постигнат пред 30 години со кој земјата го предаде своето нуклеарно оружје во замена за безбедносни гаранции што никогаш не се материјализираа, додека врши нов притисок да добие покана за членство во НАТО. Украина очајнички бара цврсти безбедносни гаранции за да се заштити од засилената руска агресија, сметајќи дека враќањето на Доналд Трамп во Белата куќа ќе ја принуди на брзо склучен договор, што ќе ја остави ранлива.

Украинското министерство за надворешни работи потсети на Будимпештанскиот меморандум од 1994, со кој Киев се откажа од својот нуклеарен арсенал, тогаш трет најголем во светот, во замена за безбедносни гаранции, вклучително и од Русија.

„Денес, Будимпештанскиот меморандум е споменик на краткорочноста на носењето одлуки за стратешка сигурност. Тој треба да им биде потсетник на сегашните лидери на евроатлантската заедница дека изградбата на европската безбедносна архитектура на сметка на украинските интереси е осудена на пропаст“, објави украинското МНР.

Украина го осудува меморандумот од 2014, кога Русија го анектираше Крим и зазеде територии во Донбас. Борбите завршија по 12 рунди преговори кои резултираа со Договорите од Минск.

„Доста со Меморандумот, доста со Договорите од Минск. Двапати е доста, не смееме да паднеме во истата стапица по третпат“, кажа Володимир Зеленски.

Киев сака да му биде понудено членство во НАТО на средбата на министрите за надворешни работи од алијансата, што почнува денеска во Брисел. Киев ги повика САД, Велика Британија, Франција и Кина да дадат поддршка за првичните безбедносни гаранции за Украина.