Украина вели дека има залихи на оружје за барем шест месеци, откако Белата куќа најави привремена пауза во американската воена помош.

„Имаме доволно ресурси што можат да траат половина година и без постојана помош од САД, но, се разбира, ќе биде многу потешко“, изјави украинскиот пратеник Федир Вениславски, кој е член на парламентарниот комитет за одбрана.

Доналд Трамп и вчера го искритикува Володимир Зеленски дека би требало да биде поблагодарен за американската поддршка откако тој кажа дека „крајот на војната е многу, многу далеку“.

„Претседателот Трамп беше јасен дека е фокусиран на мир. Сакаме и нашите партнери да бидат посветени кон таа цел. Ја паузираме и разгледуваме нашата помош за да се осигураме дека таа придонесува за решение на војната“, изјави висок функционер од Белата куќа кој сакаше да остане анонимен.

Украинскиот премиер Денис Шмихал кажа дека украинските сили можат сами да го одржат фронтот, додавајќи дека земјата ќе го зголеми производството на оружје и муниција.

„Во текот на војната имаше неколку периоди кога странската помош доцнеше. Ние Украинците немаме избор. Нема паузи во одбраната зашто непријателот не ни дава пауза. Оваа година планираме да го зголемиме домашното производство на оружје за 50% и ќе ги задоволиме сите потреби за оваа година во поглед на гранати и дронови“, рече Шмихал, додавајќи дека Украина е одлучна да ја продолжи соработката со САД.

И Кремљ реагираше на информациите дека САД запираат со целата воена помош за Украина.

„Ако ова е точно, тоа ќе биде најдобриот придонес кон мирот и киевскиот режим ќе се натера на мировен процес“, изјави портпаролот на Кремљ, Дмитри Песков.