Володимир Зеленски изјави дека Унгарија ги вратила парите и златото запленети од конвој на украинска државна банка порано оваа година. Ова е нов знак на подобрување на односите помеѓу двете земји откако долгогодишниот премиер Виктор Орбан беше поразен на изборите минатиот месец.
„Важен чекор во нашите односи со Унгарија“, напиша Зеленски на Икс.
Тој потврди дека Унгарија вратила 35 милиони евра и 40 милиони долари во готовина и девет килограми злато, што се сопственост на украинската државна банка „Осчадбанк“. Нејзиниот претседател Јуриј Кацион ѝ се заблагодари на Унгарија за нејзиниот конструктивен пристап, велејќи дека запленувањето било грубо кршење на многу меѓународни норми и правила.
Инцидентот се случи во Будимпешта во почетокот на март, кога унгарските власти запреа конвој што превезувал пари и злато меѓу Австрија и Украина. Притоа беа приведени седуммина Украинци, а Киев гневно реагираше и ја обвини Унгарија за кражба и земање заложници. Владата на Орбан, кој беше среде предизборна кампања, во која често ја напаѓаше Украина, потоа презеде чекори за конфискување на средствата.
