Унгарскиот претседател Тамаш Сулјок го потпиша законот предложен од партијата на премиерот Виктор Орбан со кој ѝ се забранува на ЛГБТ заедницата да ја одржи својата традиционална парада на гордоста. Откако законот беше изгласан во парламентот, демонстрантите синоќа блокираа мост во центарот на Будимпешта.

Новиот закон ја забранува парадата со образложение дека може да се смета за штетна за децата. Полицијата ќе може да користи камери за препознавање лица за идентификување на луѓето кои присуствуваат на настанот и да им изрекува казни.

Орбан долго време е критичен кон ЛГБТ заедницата, поради што често доаѓа во судир со Брисел. По изгласувањето на новиот унгарски закон, еврокомесарката за еднаквост Хаџа Лабиб, кажа дека правото на мирно собирање е фундаментално право што треба да се брани низ целата ЕУ.

И либералниот градоначалник на Будимпешта Гергели Карачони го критикуваше законот и кажа дека годинашната парада на гордоста би можела да биде најголема досега. И покрај забраната, организаторите кажаа дека планираат да го одржат маршот на 28 јуни.

„Будимпешта е град на слободата и парадата ќе се одржи“, рече Карачони.