Велика Британија до 21 јуни планира да ги укине сите рестриктивни мерки, објави вечерва премиерот Борис Џонсон, додека земјата забрзано ја спроведува имунизацијата против ковид-19.

Планот на Џонсон предвидува постепено олеснување на мерките, почнувајќи од 8 март, кога повторно ќе бидат отворени училиштата. Од 29 март ќе бидат дозволени собири на шест луѓе од различни домаќинства и ќе продолжат сите спортски активности на отворено.

Продавниците, фризерските салони, теретаните и некои јавни установи се отвораат на 12 април, како и зоолошките градини и тематските паркови.

Третата фаза од отворањето почнува на 17 мај, кога ќе бидат укинати повеќето ограничувања кои се однесуваат на социјални контакти и повторно ќе се отворат кината, музеите и хотелите со почитување на социјална дистанца. На стадионите ќе бидат дозволени 10.000 гледачи.

Џонсон се надева дека сите рестрикции ќе бидат укинати до 21 јуни, кога повторно ќе се отворат и последните затворени гранки на економијата, како ноќни клубови.

Околу 17 милиони Британци досега ја имаат примено првата доза од вакцината.