Владата на Доналд Трамп објави дека ќе укине повеќе од 90% од програмите за странска помош на Американската агенција за меѓународен развој (УСАИД) вредни речиси 60 милијарди долари. Владата ги претстави своите планови во интерен меморандум и во поднесоци во една од федералните тужби на адвокатите на агенцијата.

Врховниот суд интервенираше во тој случај вчера и привремено го блокираше судскиот налог со кој се бара од администрацијата да ослободи милијарди долари странска помош до полноќ.

„Официјалните лица чистат значителен отпад што произлегува од децениското институционално расфрлање со пари. Се планираат повеќе промени во начинот на кој УСАИД и Стејт департментот ќе обезбедуваат странска помош заради паметно користење на доларите на даночните обврзници за унапредување на американските интереси“, стои во меморандумот.

Доналд Трамп и Илон Маск удрија силно на американската странска помош во обид да ги намалат трошоците и бројот на федералните работници. Двајцата велат дека проектите на УСАИД промовираат либерална агенда и се непотребно трошење пари. Трамп на 20 јануари нареди запирање на речиси целата странска помош на 90 дена со цел да се направи анализа на сите програми на агенцијата.

Најавено е дека ќе се укинат 5.800 од 6.200 повеќегодишни програми на УСАИД, како и 4.100 од 9.100 грантови на Стејт департментот, во вкупна вредност од 58,4 милијарди долари.