Повеќе од 500.000 жители на Србија досега примиле вакцина против ковид-19, а милион луѓе изразиле желба да се вакцинираат, изјави директорот на Канцеларијата за информациски технологии Михаило Јовановиќ.

Србија ја спроведува една од најбрзите имунизации против ковид-19 во Европа и по глава на жител, има помала стапка само од Велика Британија.

„Првата доза ја примиле 508.000 граѓани на Србија, а 19.000 се вакцинирани и по вторпат. Во вторник почнува масовно ревакцинирање на граѓаните“, изјави Јовановиќ.

Тој кажа дека Ниш е водечки град во Србија според бројот на вакцинации.

„Во Ниш се вакцинирани околу 30.000 жители, што е 20% од полнолетното население. Дневно се вакцинираат меѓу 1.000 и 1.500 граѓани“.

Премиерката Ана Брнабиќ најави дека Србија наскоро ќе добие вакцини и од четврти производител, не прецизирајќи кој.