Украинската гранична служба вели дека трупи ја нападнале Украина од Белорусија.

„Околу 5 часот наутро, државната граница на Украина во областа со Русија и Белорусија беше нападната од руски трупи поддржани од Белорусија“, соопшти граничната служба за „Си-Ен-Ен“.

Американски функционер од Пентагон за „Си-Ен-Ен“ кажа дека имаат извештаи за трупи кои влегуваат во Украина од Белорусија. Изворот, сепак, не можеше да потврди дали трупите се само руски или има и белоруски.

Рускиот претседател Владимир Путин нареди воена операција во Украина рано утринава. Русија има околу 190.000 војници на украинската граница.

Напади имаше во регионите на Луханск, Харков, Чернив и Житомир, кои се лоцирани на источната и северна граница на Украина. Дополнително, граничната служба вели дека напади има и од Крим на југот.