Карантинот во Вухан, епицентарот на глобалната пандемија на коронавирусот, делумно ќе биде укинат на 8 април, објавија кинеските власти. Денеска се укинуваат ограничувањата за патувања во провинцијата Хубеи, на која ѝ припаѓа и Вухан.

По пауза од речиси цела недела, денеска во Вухан е пријавен прв нов случај на коронавирус.

Епицентарот на заразата во меѓувреме се пресели во Европа и САД, при што голем број држави се ставија во карантин и забранија јавни собири и патувања.

Вухан е отсечен од остатокот од светот од средина на јануари и властите кажаа дека сите кои имаат зелен код на широко користена здравствена апликација на смартфон ќе можат да излезат од градот од 8 април.

Во Кина во последните 24 часа имаше речиси 80 нови случаи на коронавирус, но мнозинството се лица дојдени од странство. Овој таканаречен втор бран на зараза ги погоди и Јужна Кореја, Сингапур и Хонгконг.