Доналд Трамп се спореди со Џорџ Вашингтон и се пофали дека за 43 дена направил повеќе од повеќето влади за четири или осум години во својот прв говор во Конгресот откако се врати во Белата куќа, што беше попречуван од некои демократски пратеници, а некои и ја напуштија салата.

„Многумина веруваат дека ова е најуспешниот почеток на претседателски мандат во историјата на САД, а само што почнавме. Се забележува промена во националното расположение кон гордост и доверба“, кажа Трамп во свој стил.

Тој збореше 100 минути, што е најдолгото претседателско обраќање во Конгресот во модерната историја на САД и говорот уследи еден ден откако Белата куќа ја запре целата американска воена помош за Украина и на сила стапија новите царини за Мексико, Канада и Кина. И покрај спорот со Володимир Зеленски, Трамп кажа дека не се откажува од договорот за ретки минерали со Украина.

„Истовремено, имаме сериозни разговори со Русија и примивме силни сигнали дека тие се спремни на мир. Нели е тоа прекрасно?“, рече Трамп, ветувајќи дека ќе донесе мир и на Блиски Исток.

Се пофали дека потпишал стотици извршни наредби, ја замрзнал странската помош, го намалил нивото на илегални минувања на границата, ги повлекол САД од меѓународни организации и договори и презел мерки за исфрлање на „воук“ идеологијата од американските школи. Голем аплауз доби откако повторно вети дека ќе го избалансира буџетот.

„До моите драги сограѓани, Америка се врати! Нашата земја е на раб на враќање какво што светот никогаш не го видел и веројатно никогаш нема да види повторно“, нагласи Трамп, добивајќи сточеки овации во републиканците.

За тоа време, демократските конгресмени слушаа во тишина како Трамп постојано ги обвинува за сите проблеми во државата. Конгресменот Ал Грин дури беше избркан од салата зашто одбиваше да седне.

Трамп го пофали Илон Маск зашто неговиот оддел ДОГЕ успеал да ја скрати федералната работна сила за 100.000 луѓе и најави дека ќе воведе нови царини на 2 април.