Доналд Трамп објави дека имал „долг и продуктивен“ телефонски разговор со Владимир Путин, при што се согласиле веднаш да почнат мировните разговори за Украина. Тој кажа дека и двајцата сакаат да запре убивањето на милиони луѓе во војната и дека веднаш ќе го информира Володимир Зеленски за разговорот со Путин.

„Со Путин разговаравме за Украина, Блиски Исток, енергија, вештачка интелигенција, моќта на доларот и за други прашања. Двајцата се присетивме дека нашите земји успешно се бореле заедно во Втората светска војна и зборевме за големите придобивки што би можеле да ги имаме еден ден ако работиме заедно. Како прво, се согласивме дека сакаме да запре убивањето на милиони луѓе во војната Русија-Украина. Се договоривме да работиме заедно и веднаш да почнеме со преговори. Веднаш ќе му се јавам на претседателот Зеленски за да го информирам за нашиот разговор“, напиша Трамп на својата социјална мрежа.

Од кабинетот на Зеленски потврдија дека тој имал едночасовен телефонски разговор со претседателот на САД.

Трамп и Путин разговараа речиси еден и пол час, потврди портпаролот на Кремљ, Дмитри Песков, што е прв директен контакт помеѓу претседателите на Русија и САД од почетокот на руската инвазија врз Украина. Песков додаде дека Путин го поканил Трамп во Москва и се договориле да продолжат со лични контакти.

Трамп кажа дека побарал од државниот секретар Марко Рубио, директорот на ЦИА Џон Ретклиф, советникот за национална безбедност Мајкл Волц и специјалниот претставник за Украина Стив Виткоф да ги водат преговорите.

„Милиони луѓе умреа во оваа војна, која сигурно немаше да се случи доколку јас бев претседател и затоа мора да заврши. Сигурен сум дека преговорите ќе бидат успешни“, додаде Трамп.

Тој во повеќе наврати кажа дека може брзо да ја заврши војната во Украина, без да открие како. Министерот за одбрана на САД Пит Хегсет денеска кажа дека не верува дека Украина може да се врати во своите граници пред 2014 и не ја гледа како членка на НАТО.