Украинскиот претседател Володимир Зеленски денеска ја номинира првата вицепремиерка Јулија Свириденко да предводи нова влада, поставувајќи ја основата за политичка реконструкција, бидејќи изгледите за крај на војната на Украина со Русија стануваат сè помали.

Номинацијата, за која треба парламентарно одобрување, е во време кога дипломатските напори за завршување на војната, која сега е во четвртата година, се во застој, а Украина се обидува да ја оживее својата економија која е во криза и да изгради домашна индустрија за оружје.

39-годишната Свириденко е економистка по образование и е прва вицепремиерка од 2021. Таа одигра клучна улога во неодамнешните преговори за договор за минерали со САД. Од почетокот на војната, таа е задолжена за обезбедување меѓународна помош и заеми.

Сегашниот премиер, Денис Шмихал, беше назначен од Зеленски во 2020, пред руската инвазија во февруари 2022.

Украина се потпира на финансиска помош од своите западни сојузници за финансирање на социјалните и хуманитарните трошоци, бидејќи најголемиот дел од државните приходи одат за финансирање на армијата и домашното производство на оружје.

Се шпекулира и дали министерот за одбрана Рустем Умјеров би можел да биде назначен за амбасадор на Украина во САД, поради извештаите дека американскиот претседател Доналд Трамп е незадоволен од актуелната амбасадорка Оксана Маркарова.