Володимир Зеленски ја врати независноста на двете главни антикорупциски агенции во Украина, преземајќи мерки за смирување на политичката криза што ја разниша довербата во неговото воено раководство и ги загрижи западните партнери. Илјадници луѓе протестираа во Киев и други градови во последните денови откако пратениците минатата недела ги усвоија амандманите со кои беа намалени овластувањата на двете агенции.

Зеленски го промени ставот под притисок на јавноста и високите европски претставници, кои предупредија дека Украина го загрозува својот обид за членство во Европска Унија. Тој потпиша нов закон откако пратениците го одобрија со 331-0 во гласови, велејќи дека законодавството гарантира отсуство на какво било надворешно влијание или мешање.

„Украина е демократија, нема сомнение“, рече Зеленски.

Новиот закон ги поништува амандманите што му дадоа овластување на главниот обвинител да им одзема случаи на агенциите и да ги прераспределува обвинителите. Тоа доведе до најголемите демонстрации во Украина од почетокот на војната, кои продолжија до вчера.

Националното биро за борба против корупција и Специјализираното обвинителство за борба против корупција ја засилија својата работа по руската инвазија во февруари 2022. Тие поднесоа обвиненија против низа пратеници и високи владини функционери, вклучувајќи и заменик-премиер, кој минатиот месец беше обвинет за земање мито од 345.000 долари.