Срѓан Керим заврши на деветтото место од десет кандидати во шестата и последна рунда тајно гласање во Советот за безбедност на ОН за иден генерален секретар на ОН, на која Португалецот Антонио Гутереш беше избран за наследник на Бан Ки-мун.
Поранешниот португалски премиер Антонио Гутереш го освојуваше првото место во сите досегашни гласања, а во последната рунда втор беше кандидатот од Србија, поранешниот министер за надворешни работи Вук Јеремиќ, а трет беше Мирослав Лајчек од Словачка.
Керим минатата рунда на гласање беше на осмото место. Денеска добил пет позитивни и девет негативни гласови од амбасадорите на земјите членки на Советот за безбедност на ОН.
На почетокот беа 12 кандидати за генерален секретар на ОН. Во меѓувреме тројца се откажаа, а минатата недела во трката се вклучи Бугарката Кристалина Георгиева. Зад Керим остана Наталија Герман, поранешна министерка за надворешни работи на Молдавија.
Јужнокореецот Бан Ки-мун ќе се повлече на крајот од 2016 година по два петгодишни мандати како генерален секретар.
