Најмалку 200.000 луѓе се собраа во Прага на протестот против чешкиот премиер Андреј Бабиш, повикувајќи го на оставка поради обвинувањата за измама.

Бабиш, кој е милијардер, се обвинува дека искористил фондови од Европската Унија за приватни бизниси, што тој го демантира.

Протестот се одржа на 30-годишнината од мирната револуција, која го најави крајот на комунистичкото владеење во тогашна Чехословачка. Денешните демонстрации се одржаа во паркот Летна, кој беше место и на најголемите маршеви во ноември 1989.

„Ние сме тука“, извикуваа демонстрантите, алудирајќи на слоганот што ги обележа протестите пред 30 години.

И додека чешката полиција го процени бројот на демонстрантите на 200.000, организаторите велат дека ги имало 300.000.

„Не разбирам зошто протестираат против мене“, кажа Бабиш.