Апелациониот суд Скопје ја пријавил шефицата на Обвинителството за организиран криминал Вилма Русковска кај Државниот обвинител Љубомир Јовески и Советот на јавни обвинители и побарал од нив да преземат мерки, дознава САКАМДАКАЖАМ.МК. Како што соопшти претходно Скопска апелација, Русковска синоќа му испратила смс порака на еден од судиите во тричлениот совет што ја пушти Катица Јанева во куќен притвор со содржина:

„Ако ти со советот сте ја пуштиле Катица, да знаеш дека од гаќи ќе ве истресам цел совет со финансиска истрага. Заради судии како Вас, никогаш нема во ЕУ да влеземе. Ако не е твојот совет, се извинувам. Ама ако сте вие, ќе видите.“

• РУСКОВСКА СЕ ЗАКАНИЛА ДЕКА ЌЕ ГИ ИСТРЕСЕ ОД ГАЌИ СУДИИТЕ КОИ ЈА ПУШТИЈА ЈАНЕВА ОД ШУТКА, СООПШТИЈА ОД АПЕЛАЦИОНИОТ СУД

Од Апелациониот суд во соопштението велат дека ваквото однесување на Русковска е кршење на Уставот, законите и Етичкиот кодексот на јавните обвинители и за тоа писмено се известени надлежните институции.

Здружението на судии застана во целост зад соопштението на Апелациониот суд Скопје и oстро ги осуди ваквите напади врз судиите, повикувајќи да престанат притисоците врз судиите при носењето на слободни судски одлуки што е загарантирано со Уставот и е гаранција за владеење на правото.

С. К. ДЕЛЕВСКА