На градскиот стадион „Билјанини извори” во Охрид наскоро ќе почне изградба на нова трибина. Таа ќе чини еден милион евра, што е најголема инвестиција во спортската инфраструктура во градот во последнава деценија. Проектот го реализираат Општина Охрид и Фудбалската федерација на Македонија.

„Трибината ќе биде изградена по највисоки светски стандарди и ќе има капацитет од 1.480 седишта. Во нејзиниот централен дел се предвидени ВИП-седишта, коментаторска кабина и простор за камери. Еден дел од трибината ќе биде наменет за инвалидизирани лица со посебни пристапни патеки”, соопштија од локалната самоуправа.

Проектот е важен за заживување на спортот во градот, но и за развој на спортскиот туризам, бидејќи се очекува на еден ваков стадион на подготовки да доаѓаат многу спортски екипи.

Д. ЧУБРИЌ