Пратеникот на ДУИ Артан Груби кажа дека неговата пратеничка група поднела речиси 5.000 амандмани на предложените измени на Изборниот закон. Според предложените измени, поднесени од група пратеници од помалите партии и независни пратеници, а поддржани од владејачката СДСМ, се менува изборниот модел од шест изборни единици во една изборна единица.

„Процес на еднонасочно, еднострано менување на правилата на игра пред да започнат изборните процеси е опасен преседан со кој би се соочило ова собрание и политичката сцена во нашата држава“, изјави Груби денеска во Собранието, додавајќи дека таквите измени треба да се носат консензуално., во согласност со сите политички партии.

Тој кажа и дека министерката за правда Рената Дескоска за утре свикала состанок на сите парламентарни, но и вонпарламентарни партии и на претставници на цивилното општество и на други институции, на кој ќе се разговара за изнаоѓање најдобар можен изборен модел и Изборен законик.

Претходно, на Комисијата за политички систем, пратеникот на СДСМ Александар Кирацовски кажа дека за измени на Изборниот законик досега се поднесени 6.000 амандмани.