23-годишниот С.Е. е приведен во врска со синоќешната престрелка во која беше пукано во автомобилот на Борис Мутков-Фантом, кој со повреди беше пренесен во болницата „Систина“, соопшти полицијата. Престрелката се случи околу полноќ близу скопско Бардовци.

„Б.М. е пренесен во болницата ’Систина‘ за укажување помош. Во врска со настанот е приведен С.Е. (23). Се преземаат мерки за расчистување на случајот“, велат од МВР.

Министерот за внатрешни работи Оливер Спасовски, на прес-конференција утринава, кажа дека се работи за пресметка на две криминални групи и останува истрагата да покаже дали има поврзаност со пукањето во хотелот „Александар Палас“.

Мутков беше еден од првите деветтемина обвинети за учество во нападот на пратеници во Собранието на 27 април 2017, кои добија условни казни.

А. АНТЕВСКА