Не е толку проблем што имаме над 300 нови случаи дневно, туку проблем ќе биде ако се наполнат болниците, предупредува директорот на Центар за јавно здравје Скопје д-р Александар Стојанов, откако вчера беа регистрирани 364 новозаболени од ковид-19, а завчера имаше 317.
„Епидемиолошката состојба е лоша, ама не е толку трагична. Не е проблем што се над 300, проблем ќе биде кога ќе се наполнат болниците. Младите кои се заразуваат одат дома, се мешаат со родители, роднини, пријатели, баби и дедовци, каде ќе ги лечиме нив, кој ќе ги лечи? Еве и монтажни болници ќе направиме, ако треба и шатори ќе дигнеме и бараки ќе оспособиме. Ќе најдеме кревети, апарати, лекови, ама лекари и сестри кај ќе најдеме?“, вели епидемиологот Стојанов.
На Стојанов не му е јасен отпорот на дел од граѓаните против мерките за заштита од коронавирусот.
„Србија ја ограничи работата на кафаните до 23 часот, Брисел целосно ги затвори, Берлин прв пат во 70 години се откажа од ноќен живот, после 23 часот ништо не работи, а кај нас не можело да се живеа ако не се пее и се игра гушнати со гласна музика, па се протестира. И пак ќе кажам, не е проблем ни кафана, ни школо, ни градинка, ни отворени граници. Проблем е непочитувањето на мерките – маски, дистанца и миење раце. Еве речиси во цела Европа границите се отворени во Шенген зоната, а баш тие во Шенген што се затворија, како Унгарија и Словенија, имаат големи бројки. Зошто? Затоа што не се почитуваат мерките“, вели Стојанов.
На вчерашната прес-конференција, министерот за здравство Венко Филипче кажа дека веќе нема место за нови пациенти со ковид-19 на инфективните одделенија во болниците во Прилеп, Струмица, Велес и во Куманово. Филипче рече дека на сите инфективни одделенија во државата хоспитализирани се 414 лица сомнителни и позитивни на ковид-19 и ова е најголем број на хоспитализација од крајот на јули .
Како што кажа тој, на Инфективна клиника во Скопје има околу 20-тина празни места, а спремна да прими пациенти е и монтажната болница каде што има 72 кревети. Во Градската општа болница „8 Септември“ има 40 пациенти.
М. ИЛИОСКИ
