Еднократна парична награда од по 30.000 денари ќе добијат седумтемина пиротехничари од Дирекцијата за заштита и спасување за нивниот посебен ангажман во пронаоѓањето и отстранувањето на илјадници гранати од Првата светска војна пронајдени во близина на Градскиот стадион во Битола. Вака одлучи Владата на предлог на премиерот Зоран Заев.

Денеска пиротехничарите ги посети Беким Максути, новоназначениот директор на Дирекцијата за заштита и спасување. Во однос на поплаките на пиротехничарите од изминатите недели дека се останати неколкумина, скоро сите над 50 години, немаат подмладок и бенефициран стаж, Максути рече дека се обидува да најде начин да им се помогне.

„Преземаме мерки за решавање на статусот на овие луѓе, кои и тоа како се потребни и со недели работат тука во услови на пандемија за да ја отстранат опасноста. Имаме и програма за ново екипирање. Низ дописи и преговори со Министерството за одбрана, ние предлагаме војници кои надминале 45 години, а имаат такви капацитети и можат брзо да се обучат, да станат пиротехничари“, рече директорот.

Тој додаде дека е во комуникација со амбасадите на земјите кои имале војски тука во Првата светска војна, како и со амбасадата на САД, за да не се вадат неексплодирани убиствени средства само ад хок, туку да се направи широка акција за детектирање и отстранување на сите останати бомби.

Акцијата за отстранување гранати во Битола заврши. Се извадија 12.300 париња или 110 тони.

„Количините се огромни и ни треба соработка со други институции, со АРМ и МВР, за транспорт и за уништување. Очекуваме дека по 15 декември на Криволак ќе почне процесот на уништување“, додаде Максути.

Ж. ЗДРАВКОВСКА