Против поранешниот претседател на Државната изборна комисија (ДИК) Оливер Дерковски и уште тројца вработени во ДИК денеска е поднесено обвинение за кривичното дело Злоупотреба на службена положба и овластување, соопштија од Основното јавно обвинителство за гонење на организиран криминал и корупција.

Станува збор за набавката на софтвер за резултати од изборите од економскиот оператор ДУНА. Според обвинението, обвинетите И.Ќ., А.А. и А.Ш. вработени во ДИК, како членови на Комисијата за јавни набавки, во периодот од февруари до септември 2020 година неизвршувајќи ги своите службени должности при спроведување на постапката за јавна набавка на софтверот за изборите, не го почитувале минималниот законски рок за поднесување понуди, не утврдиле дека економскиот оператор ДУНА ДОО Скопје не ги исполнува условите за учество во постапката и притоа не спровеле правилна постапка за евалуација на доставените понуди, туку понудата ја оцениле како прифатлива и доделиле максимален број на бодови. Потоа, врз основа на извештајот од спроведена постапка, првообвинетиот Оливер Дерковски, како претседател на ДИК, без да изврши контрола на постапката за евалуација на понудите, донел одлука за избор на најповолен понудувач.

• „ДУНА“ ГО ДОБИЛА САЈТОТ НА ДИК БЕЗ ПОТПИШАНА ИЗЈАВА ЗА СЕРИОЗНОСТ И СО ЛАЖИРАНИ ПОДАТОЦИ, СЕ ВЕЛИ ВО ПРИФАТЕНАТА ЖАЛБА ЗА ПОНИШТЕНИОТ ТЕНДЕР
• ДИК Ѝ ГО ДАЛ САЈТОТ НА КОМПЈУТЕРСКАТА ФИРМА БЕЗ ОГЛАС СО ДИРЕКТНО ПРЕГОВАРАЊЕ ЕДНА НЕДЕЛА ПРЕД ИЗБОРИ
• БИРОТО ЗА ЈАВНИ НАБАВКИ МУ УКАЖАЛО НА ДЕРКОСКИ ДЕКА НЕ СЕ ИСПОЛНЕТИ УСЛОВИТЕ ЗА НАБАВКА НА СОФТВЕР БЕЗ ОБЈАВУВАЊЕ ОГЛАС, ТОЈ НЕ ГИ ПОСЛУШАЛ
• АПЛИКАЦИЈАТА ЗА ИЗБОРИТЕ Е БЕСПРЕКОРНА, ЦЕЛ СМЕ НА СОФТВЕРСКИ ТЕРОРИЗАМ ОД СТРАНСКИ СИЛИ, ВЕЛАТ ОД „ДУНА“

Но, оваа постапка беше поништена, по што Дерковски, спротивно на мислењето на Бирото за јавни набавки, донел одлука за спроведување на постапка со преговарање без објавување на оглас и притоа по негови насоки биле намалени критериумите за вреднување на економските оператори во делот на квалитет.

„Покани за поднесување понуди за Набавка на нови и надградба на постојните софтверски решенија во ДИК биле испратени до два економски оператори и во повторената постапка повторно како најповолен понудувач бил избран економскиот оператор ДУНА ДОО со кој првообвинетиот потпишал Договор за јавна набавка. Иако бил должен пред да го потпише Договорот и пред да го имплементира софтверот да обезбеди негово тестирање заради утврдување дали истиот ги исполнува бараните услови, тој не го сторил тоа и дозволил истиот да се пушти во употреба без спроведено тестирањето и без направен квалитативен и квантитативен прием на услугата од Договорот. На ваков начин за економскиот оператор била прибавена корист – право да учествува во постапка за јавна набавка и да склучи договор на износ од 899.999,00 денари“, се вели во соопштението на Обвинителството за организиран криминал.

Во ова обвинение е и набавката на телевизори за приказ на резултатите од избори во надворешни услови. Како што велат од Обвинителството за организиран криминал, изготвувањето на техничката спецификација за оваа јавна набавка било во консултации со учесник во постапката, обвинетиот И.В.

„Покани биле испратени до 5 економски оператори на контакт адреси што не биле регистрирани во Бирото за јавни набавки, а единствениот понудувач бил економскиот оператор ТАРДИС ДООЕЛ Скопје. Обвинетиот А.Ш. како претседател на Комисијата за јавни набавки, спротивно на правилата, иако знаел и бил свесен дека обвинетиот И.В. како овластено лице на единствениот понудувач е изготвувач на техничката спецификација, ја евалуирал понудата и во Извештајот за спроведена постапка, без присуство на членовите на комисијата, дал предлог понудата да биде избрана за најповолна понуда. Обвинетиот О.Д. го прифатил предлогот и донел Одлука за избор на најповолен понудувач за предметната набавка. На ваков начин за економскиот оператор била прибавена корист – право да учествува во постапка за јавна набавка и да склучи договор на износ од 412.410,00 денари со вклучен ДДВ.“, се вели во соопштението на Обвинителството за организиран криминал.