Фирмата која го сече металот од објектите на поранешна Топилница, каде што вчера изби пожар, доби времена забрана за работа. Иако не работи 18 години, Топилницата сè уште е индустриско еколошко жариште, а објектите се во сопственост на „Метрудхем“.

„Изречена е усна забрана за работа на ‘ЗД Отпад Охрид‘, компанија која е ангажирана од сопственикот ‘Метрудхем‘ да го отстрани отпадниот метал од локацијата“, информираа од Државниот инспекторат за животна средина (ДИЖС), кој извршил увид на местото каде што се случил пожарот.

Освен нив, увид направила и екипа на СВР Велес.

„Констатирано е дека пожарот избувнал при сечењето метал од постројка за филтрирање, но не може да се утврди дали причината е контакт на искра со стара електрична инсталација или со талог од експлозивна хемикалија“, соопштија од ДИЖС.

Пожарот се случи вчера околу 11 часот и за тоа противпожарната единица од Велес ја информирале соседите, не фирмата која врши сечење на металот, ниту обезбедувањето на Топилницата.

„Во најитен рок, ‘Метрудхем‘ мора да достави документација за отстранување хемикалии и опасен отпад и нивно евентуално чување на локацијата. Истовремено, се врши надзор врз ‘ЗД Отпад Охрид‘ за да се утврди колкави количини отпаден метал се веќе отстранети и дали тој е потенцијално контаминиран со опасни материи“, стои во соопштението на Инспекторатот.

П. ПЕЧКОВ