Велика Британија ги демантираше извештаите дека руски воен брод запукал кон разурнувач на британската кралска морнарица откако наводно навлегол во руски територијални води во Црното Море.
Руското министерство за одбрана претходно соопшти дека кон бродот „Дифендер“ биле испукани предупредувачки истрели во близина на Крим, а руски борбен авион исфрлил бомби.
„Никакви предупредувачки истрели не биле испукани кон ‘Дифендер‘. Бродот пловеше во украинските води согласно меѓународното право“, објави британското министерство за одбрана.
Оттаму додаваат дека Русија изведувала воена вежба во Црното Море, за што претходно биле известени. Според руското министерство за одбрана, „Дифендер“ навлегол три километри во руските води и дека конфронтацијата се случила покрај ‘ртот Фиолент.
„Ги предупредивме дека ќе биде употребено оружје ако ја преминат границата на Руската Федерација, но не реагираа“, кажаа од руското министерство за одбрана.
