Четири лица, меѓу кои и еден затворски полицаец се повредени во масовна тепачка, која вчера се случила во Казнено-поправната установа Куманово – затвор К`шање.

Директорот на затворот, Ненад Цветковиќ, вели дека масовната тепачка во која учествувале 8 затвореници од две соби во затвореното крило, настанала поради банална расправија и нетрпеливост меѓу осудените лица.

„Веднаш реагирала затворската полиција и додека се обидувале да ги разделат повреден е еден од нашите колеги. Не се работи за тешки повреди, повеќе за огреботини и модринки, предизвикани од тепачката. Повикана е Брза помош, известена е Кумановската полиција и Јавен обвинител, на сите учесници во пресметката ќе им бидат поднесени пријави од МВР и од управата на затворот“, вели Цветковиќ.

МВР денеска соопшти дека вчера во 14.35 часот во СВР Куманово било пријавено дека во затвор во К’шање настанала физичка пресметка помеѓу 8 лица, од кои 4 се повредени со остар предмет. Меѓу нив и еден затворски службеник. На повредените им е укажана лекарска помош, а СВР Куманово презема мерки за расчистување на случајот.

С. НИКОЛИЌ