Триесетина лица ја демолирале вратата на ургентниот центар во Градската општа болница “8-ми септември“, превртеле дел од инвентарот и лековите, откако дежурните лекари им соопштиле дека пациентот кој итно бил донесен кај нив околу 18 часот, и покрај обидите да го реанимираат, починал. Тие го зеле телото на починатиот и заминале од болницата.

Проф.Д-р Сашо Стојчев, директор на ГОБ“8-ми Септември“, вели дека екипите на Министерството за внатрешни работи се уште вршат увид по инцидентот, и дека во меѓувреме е контактиран член на семејството на починатиот, кој се извинил за нередот и се заблагодарил на лекарите што се обиделе да го спасат.

“Се уште трае увидот. Искршена е вратата и превртени се дел од лековите и кантите. Апартите и другата опрема не се оштетени. Немало напад врз медицински лица, ниту пак има други повредени. Го зеле телото на починатиот и заминале во непознат правец“, вели Стојчев.

Тој објаснува дека пациентот бил донесен со Брза Помош како итен случај, а дека претходно матичниот лекар кај кого се лекувал, најавил дека праќаат итен пациент.

“Од она што ми го кажаа дежурните лекари, немало знаци на насилство врз пациентот, а тој е донесен во тешка состојба, со знаци на срцев удар. Четириест минути се обидувале да го реанимираат, но тој починал. Кога е донесен пациентот, низ главната рампа во болницата влегле десетина возила во кои имало луѓе, на кои кога им соопштиле лекарите дека починал, насилно влегле и го зеле телото“, вели Стојчев.

Според податоците со кои располага болницата, починатиот пациент е роден 1970 година.