Педесет и петгодишен маж почина откако бил прободен на улична трка со бикови во шпанскиот град Онда. Тој бил нападнат од еден од биковите на фестивалот Фира де Онда, при што се здобил со повреда на главата и му била исечена артерија во левиот бут. Тој починал во болница во соседниот град Виљареал.

Властите на Онда кажаа дека по несреќата ги откажале останатите трки со бикови, но не и целиот фестивал.

Тоа е прв смртен случај на вакви фестивали во Шпанија откако тие повторно почнаа да се одржуваат ова лето. По несреќата, во Шпанија повторно се отвори дебата дали вакви трки треба да бидат укинати.

Најпознатата улична трка со бикови е онаа во Памплона, каде што 16 учесници загинале од 1910 година.