Првиот лет од Софија до Скопје пристигнува на 11 февруари, со бугарска делегација предводена од министерот за транспорт и комуникации Николај Сабев, најави денеска министерот за транспорт и врски Благој Бочварски. Сабев ќе биде придружуван од бугарски туроператори.

Бочварски очекува оваа авиолинија да ги поврзе двата главни града и да започне редовно да оперира од почетокот на месец март.

„На 10 февруари во Софија ќе имам работна средба со министерот Сабев, заедно со нашите тимови од Комисијата за транспорт и инфраструктура, а веќе наредниот ден на 11 февруари, ќе се реализира првиот лет Софија – Скопје, каде министерот, со бугарските туроператори ќе пристигнат во Скопје. На заедничката средба тука кај нас, вклучително и со нашите туроператори, ќе разговараме за воспоставување на оваа линија како редовна, со која ќе овозможиме нови поволности и најдобри солуции за нашите граѓани. Имаме и заинтересирана авиокомпанија за реализација на оваа авиолинија и очекувам таа да стане редовна од почетокот на месец март“, изјави денеска во Кочани Бочварски.

Тој вели дека туроператорите од двете земји на средбата во Скопје ќе понудат и трета дестинација, екстензија на летот Софија-Скопје, која треба да понуди нови можности за нашите граѓани и донесе како туристички, така и економски бенефит.